Isaiah 42

Inceku KaThixo

1“Nansi inceku yami engiyisekelayo,
okhethiweyo wami, engithokoza ngaye.
Ngizabeka umoya wami phezu kwakhe,
uzaletha ukulunga ezizweni.
2Kayikumemeza kumbe aklabalale,
loba aphakamise ilizwi lakhe emigwaqweni.
3Umhlanga ohluzukileyo akayikuwuquma,
lentambo yesibane etsha kancane akayikuyicima.
Ngokwethembeka uzaletha ukulunga;
4akayikudinwa kumbe ephulwe inhliziyo
aze alethe ukulunga emhlabeni.
Izihlenge zizakwethemba umthetho wakhe.”

5Lokhu yikho okutshiwo nguNkulunkulu uThixo,
yena owadala amazulu wawelula,
yena owendlala umhlaba lakho konke okuphuma kuwo,
yena onika abantu abakuwo ukuphefumula,
kuthi abahamba kuwo abanike ukuphila:
6“Mina, uThixo ngikubizile ngokulunga;
ngizabamba isandla sakho.
Ngizakulondoloza
ngikwenze ube yisivumelwano sabantu
lokukhanya kwabeZizwe;
7uvule amehlo eziphofu,
ukhuphe abathunjiweyo entolongweni,
ubakhulule emigodini yezibotshwa labo abahlala emnyameni.

8Mina nginguThixo, lelo yilo ibizo lami!
Ubukhosi bami angiyikubunika omunye
loba nginike izithombe udumo lwami.
9Khangela, izinto zakuqala sezenzakele,
njalo ngimemezela izinto ezintsha;
zingakaveli ukuba zibe khona
ngiyakutshela ngazo.”

Ingoma Yokudumisa UThixo

10Hlabelelani uThixo ingoma entsha,
udumo lwakhe kusukela emikhawulweni yomhlaba,
lina eliya phansi olwandle, lakho konke okukulo,
lina zihlenge, labo bonke abahlala kini.
11Inkangala lamadolobho ayo kakuphakamise amazwi akho;
imizi uKhedari ahlala kuyo kayijabule.
Abantu baseSela kabahlabele ngentokozo;
kabaklabalale besezinqongweni zezintaba.
12Kabamdumise uThixo,
amemezele udumo lwakhe ezihlengeni.
13 UThixo uzaphuma njengendoda elamandla,
njengebutho uzavuthela ukutshiseka kwakhe;
ngokuklabalala uzakhuza isaga sempi
azinqobe izitha zakhe.

14“Bengithule okwesikhathi eside kakhulu,
bengithule ngizithiba.
Kodwa khathesi, njengowesifazane ebeletha,
ngiyakhala, ngiyakhefuzela ngiphefuzela.
15Ngizabhidliza izintaba lamaqaqa;
ngilomise lonke uhlaza lwabo;
ngizaphendula imifula ibe yizihlenge
ngomise lamachibi.
16Ngizakhokhela iziphofu ngezindlela ezingazaziyo,
ngizihole ngezindledlana ezingajwayelekanga.
Ngizaphendula umnyama ube yikukhanya phambi kwazo;
ngenze izindawo ezimakhilikithi zibe butshelezi.
Lezi yizo izinto engizazenza;
angiyikuziyekela.
17Kodwa labo abathemba izithombe,
abathi kuzifanekiso, ‘Lingonkulunkulu bethu,’
bazabuyiselwa emuva beyangeke impela.”

U-Israyeli Uyisiphofu Njalo Uyisacuthe

18“Zwanini, lina zacuthe;
khangelani, lina ziphofu, libone!
19Ngubani oyisiphofu ngaphandle kwenceku yami,
loyisacuthe njengesithunywa engisithumayo na?
Ngubani oyisiphofu njengalowo ozinikele kimi,
oyisiphofu njengenceku kaThixo na?
20Selabona izinto ezinengi, kodwa kalinakanga;
indlebe zenu zivulekile, kodwa kalizwa lutho.”
21Kwamthokozisa uThixo
ngenxa yokulunga kwakhe
ukuba akhulise umthetho wakhe ube mkhulu njalo ulodumo.
22Kodwa laba ngabantu abaphangiweyo bathunjwa;
bonke bavalelwe emiwolweni,
loba bafihlwa ezintolongweni.
Sebenziwe baba yimpahla yokuthunjwa,
kungela ozabasindisa;
sebephendulwe baba yinto yokuthunjwa
kungekho othi, “Babuyiseleni emuva.”

23Ngubani wenu olalela lokhu,
kumbe asinake isikhathi esizayo na?
24Ngubani owanikela uJakhobe ukuba abe yinto yokuthunjwa
wanikela lo-Israyeli kubaphangi na?
Kwakungasuye uThixo,
esamonelayo thina na?
Njengoba babengeke balandele izindlela zakhe;
kabalalelanga umthetho wakhe.
25Ngakho wathela ulaka lwakhe oluvuthayo phezu kwabo,
ukutshisa kwempi.
Wabamboza ngamalangabi, kodwa kabezwisisanga.
Wabaqothula, kodwa kabakhathalanga.